Nkaná na Eráŋá ra tuki

Tévéké a ma oná mbavé na vaná

            Moto omo na edɔngɔ yá Okí a ma ré sombye ; wusí wómó na ojetá ówó na mpano, téngémétérí na osaá, na raaté wa kondo, a etiyamó mbavé na vaná va omana negena na ongóná.

           Mbavé e ma vásóriyamó to anáá índi a me wudye na osaá na vaná váá bimé. Moto noóngo nó me ambaanamó, a byamó mbavé naáté yá nkute uhúmé ówó na osaá mbavé a ye anaá a nyámó Tévéké ; Tévéké odekana eeŋ mbavé ye vatɔ́ɔ́tɔ́ ? Mbavé ka owá .

           Isimí mwané íwóto í ma ré rií naáté yá asɔɔ́, í rií na owo ́vátɔ́rɔ́ , kóó í wó penamó ; kóó í wó súsamó até éyé é te káte tómbá ; Tévéké a patakanamó. Íwóto a ye anáá a ta me wowá maaro mwané a re ka wunde wená amó Tévéké a mó báréya na homó ówó a me etíye mbavé ondo jine na osaá.

           Kóó vá wundamó ová wówáána hée ; Tévéké a wundamó one wɔ́rɔ́ mbavé na vaná o wó wáá naáté yá nkute ondo jine homó ówó a ma wé wɔ́réna. Kóó Iwótó a ma bárá ongúté a ye na Tévéké anáá : « Moto o nyánamó mbavé o ? » A ye naá anáá eeŋ .

           Kó engamó anáá kaá óná mbavé na vaná biméondo nyá. Okésyé ówó isí mwané íwóto í ma búndé inóoní rá iki na noyómó na Tévéké.

           Na mamana, vambíso peyɔ éjé to mó ojo wɔ́rɔ́ e ámó anáá < wusi ówó moto a engamó na cí éjé wó ta dángá . 

 Akwa a ma rií NJƆƆ OMBÁRÁ kó ojo a ma aŋgɔ́ɔ kójo Ahumu WOKÓNÓ Yóseve Ogónó wa vayéere vihóóhona vyá vayéere vá tuki

Oráŋá: O ta hítí o hóréta erórá. 

Ogónó ogónó a ma kwa nkaná ye anáá: Okótó a ma rií ibwana na imgbémé,itindíkáná íngímáná a báréyana na ondo byaana ówó nama íjí ibwana ráá í ma katé o mo vétyáána ;amó isí,wenda obya wenda etá na ijí na nangá.

Vato vá ma ré kémbyé vá mo súsé ané ójó a rumamó o mo hwáána nama mwané .Okótó a ye nawó anáá ómwáné a etíyanamó nama ímíjí, béŋ vigwé na vigwé ka ijíme ójó a rumamó woná. Mesí má tómbána okótó a ámó na wendana ówó na njáná a enda etána na kaká raá tɔ́s na vigwé vyá nama.

Kó isí éyé na edɔngɔ yá okótó ójó, matéyá má ma késyé ojámávena; okótó a ma báréya orɔngɔ na sɔ́ɔ́ okótó anáá vá etá sɔsɔ matéyá,vá ndenda vá ndenda, ojomo a núnétanamó ehándá éyé imbgémé í ma ré sɔ́tɔ́ áwɔ́ ; kó a engamó na ojomo anáá: Ndámó na wohwaá itíndíkáná íngímé nkatamó tómbá berebe na ehándá éyé; imbgémé í sɔ́tɔmó áwɔ́.

Ojo ibwana rá imbgémé a engamó naá anáá: otongó owá wohwaá, í ta enga wandá,a endamó na enjárá na wusó a ye anáá a ta béyá ungúté, ó mo numbamó wobé.A járámó náná ka ijíme anáá imbgémé í káte mo vátɔ́rɔ́. Kó vá ma tombá,otééta matéyá owunde wetá na vámwáné.

Isí índyé, okótó a namó báréya ondo etííye imbgémé índi a tótá vigwé vyá nama víndyé.Kó í járámó naá anáá:tótá nama íjí íríyamó  ímíji ,wetá,índi wá wunde wusóó metúú matátó,timbamó viséki nɔɔ.

Mesí mátátó má tómbá,kó okótó a endamó na tánó raawó. A húmé na ibérúmáná,imgbémé a ye naá anáá:Vigwé vyá nama víndyé iví,hɔrɔ́ wa árɔ́ɔ́ ka tótá, maná ongojana até éyé o timbamó na ombɔ́ɔ́ eméye ?

Okótó a wundyamó anáá ohánó. Imgbémé a engamó naá anáá ngabetámó na ekɔ́hé,ibwana ráá yé etá kémbyé a járámó anáá, ómwáné a ta hítí.Kó imgbémé yéngamó naá anáá : Wa rií ka enga até éyé ngo wo susámó,noó kójo ngo wengamó.Na wohwaá na otémá,okótó a váyévamó, ováténgéya bɔk! na ohánó na ekɔ́hé yá imgbémé.

Na nimé ra yobi, kó imgbémé yéngamó naá anáá : Wɔ́rɔ́ nama rɔ́ɔ́ ndá ! Ómówo wó tómbamó.Metúú má tómbá, okótó a namó ondo véwúndye sém amó na póná berebe na imgbémé; kó idinge ráá í mo janamó anáá: wombérá wá visó wá omana,ítɔɔ wá nama;esene éyé anáá o ta hítí o wá hóréta erórá éyé. 

Akwa a ma rií NJƆƆ OMBÁRÁ kó ojo a ma aŋgɔ́ɔ kójo Ahumu WOKÓNÓ Yóseve Ogónó wa vayéere 

vihóóhona vyá vayéere vá tuki